Носител на проектот е камерениот ансамбл ПИЈАНО ФОРТЕ СТРИНГС, кој го сочинуваат наши млади музички уметници, како и врвни музички педагози. Ансамблот се базира на филозофијата на врвна музика достапна за секого. На своите настапи секој пат се негуваат високи културни вредности, со разновиден, приемчив репертоар и концертирање во несекојдневен сценски амбиент. Составот се менувал со текот на годините, па варира од камерни музички состави за придружба на млади солисти, камерни триа и дуети, како и солистички настапи на дел од членовите во рамките на заедничките рецитали.

Во рамките на проектот, ансамблот пред словенечката публика презентираше македонско современо, како и народно музичко творештво. Се оформи и копродукциски настап во кој составот на ансамблот се зголеми благодарение на колегите од Љубљана.

На свечениот концерт, покрај македонските композиции изведени од ансамблот, имаше аранжмани на словенечка народна мелодија за класичен состав и класични солистички и камерни дела. Домаќините од Словенија имаа свој дел од програмата, на кој покрај другото прозвучуваат и Македонски композиции.

Благодарение на онлајн и мултимедијалните технологии, редуцирањето на бројот на гостите во публиката (секако, поради актуелните мерки за заштита од КОВИД-19) се компензираше преку отворен онлајн линк. Секој кој беше заинтересиран да присуствува на овој концерт, а не беше во можност да дојде во салите „Музеј на македонската Борба“ во Скопје, односно „Валдорфската школа“ во Љубљана, тоа можеше да го стори преку онлајн линкот кој беше претходно објавен.